Blog dal Guardianut

Scrîf! - Prove su strade

2009-11-07T13:12:00.003+01:00

Ce figade :-D
O ai pene discjamât Scrîf!, ven a stai il picjul software par podê scrivi messaçs SMS par furlan che si pues cjatâ in version beta sul sît de Provincie di Udin a cheste direzion.
Jo lu ai provât sul gno Nokia 5310 XpressMusic.
La instalazion vie telefono no à dât bon fin, alore o ai provât cun chê tradizionâl, ven a stai discjamant il file prime sul computer.
Scrîf! al si instale come une normale aplicazion, a mieç dal Nokia Application Manager che si cjate jenfri i ordens dal Nokia PC Suite.
Pene si invie il program pe prime volte si scuen dâ l'acet a un messaç par permeti a Scrîf! di podê doprâ il nestri telefonut par mandâ sms par cont sô cence passâ par l'editor normâl.
Dopo chest passaç si si cjate denant de interface par scrivi l'sms. Se a savês doprâ il dizionari T9 sui Nokia,
alore nol è nuie di gnûf di savê!
Une volte scrît il test si pues sielzi se inviâlu o salvâlu tai stampons (bozze). Il rest al è il solit, sielzi il numar (o i numars) dal destinatari o scrivilu a man e vie...fât il lavôr!
L'unic picjul difiet che o ai cjatât al è il fât che se si è usâts a scrivi messaçs come saetis, chest picjul software al à bisugne di une picjule frazion di secont di spiete jentri ogni pression di tast, ma jessint une version di prove o disarês che a promet benon pal avignî!
Vait a provâlu!!
O speri veramentri che al cjapedi pît come il Firefox par furlan di Pontisso e De Corte (link), in spiete di vê il furlan za inserît di default dentri tai nestris telefonuts.

Trst di ducj e di nissun

2009-10-31T14:41:00.002+01:00

O ài pene finît di viodi lis gnovis dal TG1, in sierade al jere un servizi sul gnûf curtmetraç comic dal regjist Žiga Virc "Trst je naš" che al à jevât une vore di critichis pal titul e pal teme tratât.
Stant che al à ancjemò di jessi, nissun no lu à ancjemò podût viodi...però za de bande des associazions di istrians e dalmatis si son jevadis critichis e cualchidun al vûl partâ il regist in tribunâl cu la acuse di "Istigazion al odi raziâl".
Ce varèssial di dî cualchidun altri su chê cragne di "Il cuore nel pozzo"? No sai.
Jo prime di fâmi une opinion su la opare o volarès almancul dâi un cuc, però il grant displasè che o sint dentri al è che intal stât talian se si fevele di Slovenie, slovens e dal cunfin orientâl al è simpri o par fevelâ des tragjediis de Prime e Seconde vuere mondiâl (sierant biel biel i voi su lis copariis dal esercit talian, come chês par esempli dal cjamp di concentrament di Visc) o cu la anacronistiche smire nazionaliste che ancjemò e stente a murî; uniche ecezion: Boris Pahor, che par miracul al è rivât cu la sô vôs in dute la penisule.

Lenghiscj di doman

2009-10-26T20:30:00.004+01:00

Dopo un biel pôc o scrîf un messaç che al conte dôs robis diferentis ma leâdis...

La zornade di vuê e je scomençade cuntune biele cjaminade atôr pe stradis dal centri storic di Udin, dulà che, timp di lâ de stazion de corieris ae vie Zanon, o ai vût il plasê di scoltâ almancul una desene di lenghis, dal todesc al gjaponês passant par cualchi lenghe africane che no savarès nomenâ cun sigurece.
No sai parcè, ma o ai simpri dât par scontât che un che al studie lis lenghis e al vûl fâ de cognossince di una o plui lenghis forestis l'orden dal sô mistîr, al scugne volêi ben a dutis lis lenghis dal mont, ma di râr mi capite di cjatâ fra i students de facoltât di Lenghis e Leteraturis forestis une persone di cheste fate.
And'è...ma a son masse pocjis.
Clâr, se si fevele in toni di scherç, si pues dî (plui o mancul) ce che si vûl, ma cuant che intun coredôr di cheste facoltât a mi rivin tes orelis frasis come "La LENGHE X mi sa di gay" o "Io il LENGHE Y non lo sopporto" o ancjemò "Il LENGHE Z è perfetto per bestemmiare e basta" e vie indenant (ditis cun fermece), mi domandi se o soi jo la moscje blancje...o la pecora nera de famee, mah.
Insome, biel che o stavi pensant a cheste cuestion, mi capite di fâ il viaç bande cjase cuntune mê amie (studentesse di lenghis a Udin) e cun je, no mi visi in ce maniere, a sin finîts a fevelâ dal furlan. Cheste fantate e jo si cognossin che a son za un pôcs di agns e come che jo sai che jê e je une che no à tantis simpatiis pes pretesis des minorancis lenghistichis in gjenerâl, je e sâ che jo o ai altris convinciments.
Insome, fevelant, e salte fûr cheste frase: "Guarda io il friulano, non riesco a impararlo...poi anche il fatto che non abbia una grammatica scritta...".
PAUSE, respîr... :-)
....dopo cualchi sclariment i domandi "Ma veramente credevi che il friulano non avesse grammatiche?", la rispueste: "Beh sì insomma ...lo immaginavo, se esiste la Filologica estisterà anche una grammatica del friulano....".
Cheste e je la situazion, miôr cjapâle in ridi e a esempli di trop fonde che e je la fuesse ingjavâde tal cjaf di ogni gjenerazion de mancjanze di informazions (soredut a nivel scuelâr) sul puest dulà il destin (o cui par lui) nus à mitût a stâ.
Ce robis!

Fin stemane e si cjante!

2009-09-19T15:34:00.002+02:00

Vuê ducj i plens di sêt a scugnin lâ a Udin a Friuli DOC.
Jo invezit, esemplâr particolâr, o voi a Triest :-)
Sì, parcè che il Côr Polifonic "Claudio Monteverdi" di Rude, ven a stai la formazion cjantarine dulà che o fâs il bas, dopo la date di îr in Basiliche a Grau, vuè al fâs une date dal festival Cori d'Europa inte Sale Tripcovich a Trst.
Par cheste stagjon dal festival a vin come ospit il Côr feminin "Domina" di Tartu (Estonie), che simpri îr o ai vût plasè di compagnâ in visite ai cjistiei di Strassolt.
Si scomence aes 9 sot sere, la jentrade e je sore nuie, us spieti! ;-)
A Friuli DOC o larai doman cu la parone, il famôs blogarìn Christian Romanini al sarà te tende di Glesie Furlane, o ài di passâ a dai un voli, hehe!

Ce cine(s)!

2009-09-08T17:40:00.007+02:00

Domenie stade picjul zîr pes culinis furlanis,
o soi stât cu la morose prin a Cuals par viodi la mostre fotografiche “Oshevensk passaggio in Russia” dal brâf Francesco Comello (culì cjatais un pocjis di fotos) e sot sere a sin lâts a viodi la seconde serade de prime edizion dal Festival Bienâl Internazionâl di Curtmetraçs inmaneât dal Istitût Tellini intal cjascjel di Colorêt di Mont Alban, cuntune sezion ancje pe lenghe furlane.
E jere ancje une picjule mostre di piture cu lis oparis contignudis tai volums de golaine "Miti, fiabe e leggende del Friuli storico", ancje chês di gno pari, hehe!
Pe prime edizion al è stât sielzût come teme "D'incjant, l'incjant", ven a stai lis liendis, il rapuart dal on cul sorenaturâl e cun ce che no i voi no mostrin.
Serade bielissime, ve chi "Vietato fermarsi" di Pierluigi Ferradini, la pelicule che mi è plasûde di plui:

O torni a vierzi

2009-09-04T11:56:00.010+02:00

Mandi a ducj,

dopo passe un an o scrîf alc su cheste pagjine dismenteade.
La nassite dal blog a je stade pardabon disfortunade...cumò o ài di cirî di jessi regolâr tes publicazions.
O soi pene tornat di passe un mês di vite in Europe centrâl, prime o soi stât a Olomouc (esperience bielissime) par un altri cors di lenghe ceche, podopo cun gno cusin Massimiliano e il gno gnûf amì Jyrki di Helsinki a sin lâts in Polonie (Cracovie, Auschwitz, Wieliczka, Varsavie) e daspò dome jo e Max a sin stâts a Praghe, la citât dal gno cûr.
Pal rest, no viôt l'ore di laureâmi, no pues plui di fâ il student!

Ce isal cambiât in curt tal ultin an achi dulintor?

Tal cimitieri di Romans e je finalmentri stade pojade une lapide in ricuart dai citadins romanês che a àn lassât lis sieis fameis in uniforme austriache pe vuere 1914-1918 e che no son plui tornâts (90 agns dopo...).
La Ikea di Vilès e je pronte e spiete di jessi vierte, cun tant di oparis stradals e v.i., un pugn tal voli che mi fâs sgrisui ogni volte che i passi denant.
Tai ultins timps la Lee Nord e à fâte sô la idee dal insegnament dai dialets intes scuelis e la stampe taliane (prin di dut la riviste L'Espresso) e a cjapâde di smire la tutele dal furlan (che dialet nol è) come esempli negatîf di chestis politichis.

Vuè dopodimisdì o voi a Guriza lì de Filologjiche a cjoli il gno atestât di partecipazion al cors pratic di lenghe furlane che o ai frecuentât un pâr di mês indaûr, no viôt l'ore e o speri di viodi la nestre bravissime e vivorose mestre Anna Madriz.
Par cumò al è dût, ae prossime!

2008-07-01T16:53:00.004+02:00

Mandi a ducj de Cechie!!

Une peule mai vidude prime di cumò mi à copat doi computers intune stemane...e cumò di cassù no pues postâ nie di ce (almancul fincuant che no cjati une buine anime che mi fasedi doprâ il so portatil)...agrhaghrgahrghagra
Un post decent e rivarâ in curt o speri...pal rest dut ben!

ROMANS: Si sdrume la ponte dal camin de fornâs

2008-06-26T23:10:00.012+02:00

Vie pe gnot si sdrume un picjul toc di storie industriâl dal gurizan.
Cole la ponte dal camin da fornâs di Romans, cambiant par simpri la "skyline" dal paîs.
Come a Los Angeles, ancje culì si spiete al Big One, ven a stai la zornade dulà che al camin nol esistarâ plui.
La viele fabriche di modons e cops, in vore dal dal 1903 a ducj i agns '60 dal secul passât, je stade una impuartante font di redit pes fameis contadinis dal paîs e no dome.
In timp di vuere, daspò de invasion taliane, je coventade ancje come ospedâl militâr. In chist lûc al è ancje stât fusilât cualchi soldat che si refudave di lâ a combati.
L'edifici al è un toc di archeologjie industriâl e il puest al è stât una crosere par une vore di gjenerazions di chenti.
Indiana Miguel al à prontât il reportage :-D

Gracis a Zonch pe foto dal camin prime dal event.

Spindi e spandi

2008-06-25T08:13:00.008+02:00

Il gno grant acuist de zornade di îr!
Un bombon di fier di sorpessâ "di sachete".
...
Prossime tape: imparâ a sopressâ una cjamese.
......
La tape dopo: la concuiste da mont, muhahahah!

Prin messaç!!!!!!!

2008-06-24T16:19:00.012+02:00

Mandi a ducj!

Vierzidure in grant stîl di chist gnûf blog, cuntun biliet di viaç!
Sabide o scjampi in Cechie (a Poděbrady), dulà che par un mesut o fasarai un cors di lenghe ceche...sperìn ben!!!

Il blog lu ài viert par vê un puestut dulà scrivi cualchi pinsîr...ogni argoment al pues lâ ben, fur che lis paranois esistenzials :D

Prossins messaçs un pocut plui sugôs a rivaràn in curt...par cumò, mandi!